Respublikaçılar Partiyasından prezidentliyə namizəd Donald Tramp seçkilərə qədər hər gün Şimali Karolinada tərəfdarlarını mitinqə toplayacaq. Tramp 2016 və 2020-ci illərdəki kampaniyalarında qalib gəldiyi ştatda fəallıq nümayiş etdirəcək.
Bu barədə Associated Press xəbər verir.
Tramp demokratların ştatı sayılan Nyu Meksiko və Virciniyaya səfərləri ilə öz seçki xəritəsini genişləndirməyə çalışsa da Şimali Karolinada əhəmiyyətli vaxt keçirir. Bu ştat sonuncu dəfə 2008-ci ilin prezident seçkilərində demokratları dəstəkləyib.
Cənub əyaləti dörd il əvvəl demokrat Bayden üzərində 1,3 faiz olmaqla Trampa ən az faizlə qələbə qazandırıb.
Şənbə günü Tramp Şarlottanın qərbindəki Qastoniya və Qrinsboroda seçki kampaniyası keçirəcək, Virciniya ştatının Salem şəhərində dayanacaq. O, bazar günü şərqdəki Kinqston şəhərində, bazar ertəsi isə Raleighdə olacaq. Bu dörd mitinq onun Şimali Karolinada oktyabrın 1-dən etibarən çıxışlarının ümumi sayını doqquza çatdıracaq.
Trampın Demokratik rəqibi olan vitse-prezident Kamala Harris də konsert və mitinq üçün şənbə günü Şimali Karolinaya səfər edəcək.
