Yay aylarında temperatur yüksəldikcə orqanizmin suya olan tələbatı da artır. Bir çox insan susuzluğunu aradan qaldırmaq üçün yalnız su içməyin kifayət etdiyini düşünsə də, mütəxəssislər bildirirlər ki, həddindən artıq tərləmə zamanı orqanizm təkcə maye deyil, həm də vacib minerallar itirir.
İsti havada tərləmə nəticəsində natrium, kalium və maqnezium kimi elektrolitlər azalır. Bu maddələr əzələlərin, sinir sisteminin və ürəyin normal fəaliyyəti üçün mühüm rol oynayır. Onların çatışmazlığı halsızlıq, başgicəllənmə, əzələ spazmları və diqqətin zəifləməsinə səbəb ola bilər.
Həkimlər bildirirlər ki, gün ərzində kifayət qədər su içməklə yanaşı, meyvə və tərəvəzlərdən, ayran kimi təbii içkilərdən və mineral tərkibli qidalardan istifadə etmək də vacibdir. Xüsusilə açıq havada çalışanlar və idmanla məşğul olanlar maye balansına daha çox diqqət yetirməlidirlər.
Mütəxəssislər həmçinin xəbərdarlıq edirlər ki, susuzluğu qazlı və şəkərli içkilərlə aradan qaldırmağa çalışmaq düzgün seçim deyil. Bu içkilər qısa müddətlik rahatlıq versə də, orqanizmin maye balansını bərpa etməkdə su qədər effektiv olmur.
Əgər isti havada güclü baş ağrısı, ürəkbulanma, huşun bulanması və ya ürək döyüntüsünün sürətlənməsi müşahidə edilərsə, bu, istilik vurmasının əlaməti ola bilər və təcili tibbi yardım tələb edir.
Sunay
