Ukraynada hava hücumları ilə bağlı həyəcan siqnallarının tez-tez elan edilməsi Ali Radanın iş rejiminə də təsir göstərir. Deputatlar parlamentin fəaliyyətinin Kiyevdə daha təhlükəsiz məkana keçirilməsi variantını müzakirə edirlər.
Ali Radanın humanitar və informasiya siyasəti komitəsinin sədri Nikita Poturayev bildirib ki, hava həyəcanları səbəbindən parlamentin normal fəaliyyət göstərməsi çətinləşib.
Onun sözlərinə görə, son iclaslardan birində Kiyevdə iki dəfə hava həyəcanı elan edilib və nəticədə deputatlar yalnız bir qanun layihəsinə səs verə biliblər.
“Ali Rada belə rejimdə işləyə bilməz. Düşünürəm ki, vəziyyət daha da pisləşəcək”, – Poturayev bildirib.
Deputatın sözlərinə görə, Kiyevdə parlamentin fəaliyyətini keçirmək üçün daha təhlükəsiz bir məkan mövcuddur. Bu variant hazırda müzakirə edilir.
Poturayev qeyd edib ki, həmin məkanın parlament üçün istifadə olunması hələ 2022-ci ilin fevral-mart-aprel aylarında planlaşdırılıb. Lakin həmin dövrdə təhlükəsizlik vəziyyətinə baxmayaraq, Ali Rada öz iclaslarını əsas binasında keçirməyə davam edib.
Deputat təhlükəsizlik səbəbindən həmin məkanın dəqiq yerini açıqlamayıb.
Kiyevdə hava hücumları ilə bağlı həyəcanların intensivləşməsi Ukrayna parlamentinin iş formatının dəyişdirilməsi məsələsini yenidən gündəmə gətirib.
