Bir çox sürücü avtomobildə telefonunu 12 voltluq “alışqan” girişinə – qoşduqda onun çox yavaş enerji topladığını, hətta faiz göstəricisinin azaldığını görür. İlk ağla gələn səbəb avtomobilin elektrik sistemi olsa da, problem çox vaxt istifadə olunan adapter və kabeldə olur.
BGR yazır ki, avtomobildə telefonun sürətli enerji yığmamasının bir neçə əsas səbəbi var.
1. Köhnə və ya keyfiyyətsiz adapter
Avtomobilin 12 voltluq rozetkası kifayət qədər enerji təmin edə bilər. Lakin telefonun nə qədər sürətlə enerji yığması əsasən həmin rozetkaya taxılan adapterdən asılıdır.
Ucuz adapterlərin bir qismi müasir smartfonların tələb etdiyi gücü təmin etmir. Bundan başqa, USB Power Delivery (PD) və Qualcomm Quick Charge kimi sürətli enerji doldurma texnologiyalarını dəstəkləməyən adapterlər telefonun sürətli şarj imkanından istifadə etməsinə imkan vermir.
Nə etmək lazımdır? USB-C çıxışı olan və etibarlı istehsalçı tərəfindən hazırlanmış müasir avtomobil adapterindən istifadə etmək məsləhətdir.
2. Problem kabeldə ola bilər
Güclü adapterdən istifadə edirsiniz, amma telefon yenə də yavaş enerji yığırsa, kabeli dəyişmək lazım gələ bilər.
Köhnəlmiş və zədələnmiş kabellər lazımi gücü ötürməyə bilər. Xüsusilə sürətli enerji doldurma üçün uyğun standartları dəstəkləyən kabel seçmək vacibdir.
Yəni bahalı adapterə pul xərcləyib köhnə kabeldən istifadə etmək sürətli şarj nəticəsi verməyə bilər.
3. Telefon aldığı enerjidən daha çox enerji sərf edir
Bəzən telefon əslində normal sürətlə enerji yığır, sadəcə həmin anda özü də çox enerji sərf edir.
Məsələn, avtomobildə naviqasiya proqramı işləyirsə, ekranın parlaqlığı yüksəkdirsə, mobil internet və digər simsiz bağlantılar aktivdirsə, batareyanın sərfiyyatı artır.
Bu zaman telefonun aldığı enerji onun sərf etdiyi enerjini tam kompensasiya etməyə bilər. Nəticədə cihaz şarjda olsa da, batareyanın faizi çox yavaş artır və ya hətta azalır.
Daha sürətli enerji yığması üçün ekranın parlaqlığını azaltmaq, ehtiyac olmayan proqramları bağlamaq və enerji sərfiyyatını azaltmaq olar.
Bəs ən sadə həll nədir?
Avtomobildə telefonun yavaş şarj olması halında ilk növbədə avtomobili günahlandırmaq lazım deyil.
Adapteri, kabeli və telefonun həmin anda nə qədər enerji sərf etdiyini yoxlayın.
Müasir və keyfiyyətli adapter + uyğun kabel + daha az enerji sərfiyyatı avtomobildə telefonun enerji yığma sürətini əhəmiyyətli dərəcədə yaxşılaşdıra bilər.
