İran Prezidenti Məsud Pezeşkian MDB sammitində Tehranla təşkilat arasında əməkdaşlığın inkişaf etdirilməsi üçün “MDB+1” formatının yaradılmasını təklif edib.
Onun sözlərinə görə, İran özünü regionun qarşılıqlı əlaqəli coğrafiyasının təbii hissəsi hesab edir. Bu əlaqələr təkcə coğrafi xarakter daşımır, həm də tarixə, mədəniyyətə və xalqlar arasında münasibətlərə əsaslanır.
“İran dialoq və əməkdaşlıq üçün çevik və səmərəli mexanizmin — “MDB ölkələri + İran” və ya “MDB+1” formatının yaradılmasını təklif edir”, – deyə İran Prezidenti iştirak etdiyi MDB sammitində bildirib. Bu, Pezeşkianın MDB sammitində ilk iştirakıdır.
O əlavə edib ki, yeni format tranzit, energetika, ticarət, faydalı qazıntıların hasilatı, investisiyalar, texnologiyalar, su ehtiyatları və ətraf mühitin mühafizəsi, turizm, eləcə də elmi və mədəni əlaqələr kimi sahələrdə birgə fəaliyyəti inkişaf etdirməyə imkan verəcək.
