Milli Məclisin Azərbaycan–Türkiyə parlamentlərarası əlaqələr üzrə işçi qrupu Türkiyənin bəzi media orqanlarında və sosial şəbəkələrdə Azərbaycana qarşı qərəzli informasiya kampaniyasının aparılmasından narahatlığını bildirib.
İşçi qrup Türkiyənin hakim Ədalət və İnkişaf Partiyasının (AKP) bəzi deputatlarının və Prezidentin baş müşaviri Oktay Saralın Azərbaycanla bağlı açıqlamalarını əsassız hesab edib.
Azpost.info xəbər verir ki, bu barədə Milli Məclisin Azərbaycan–Türkiyə parlamentlərarası əlaqələr üzrə işçi qrupunun bəyanatında bildirilib.
Bəyanatda vurğulanıb ki, Azərbaycan və Türkiyə arasında dostluq, qardaşlıq və strateji müttəfiqlik münasibətləri mövcuddur. Bununla yanaşı, hər iki ölkənin müstəqil və suveren dövlət olduğu xatırladılıb.
“Azərbaycan müstəqil və suveren dövlətdir, daxili və xarici siyasətini öz milli maraqlarına və Konstitusiyasına uyğun müəyyən edir. Ulu öndər Heydər Əliyevin müəyyən etdiyi “Bir millət, iki dövlət” prinsipi məhz iki müstəqil və suveren dövlətin mövcudluğunu nəzərdə tutur”, – bəyanatda qeyd olunub.
İşçi qrupun fikrincə, bu prinsipin mahiyyətinin təhrif edilməsi və ondan Azərbaycanın daxili işlərinə müdaxilə üçün istifadə olunması qəbuledilməzdir.
Məktəblərdə geyim müzakirələrinə də münasibət bildirildi
Bəyanatda Azərbaycanın dünyəvi dövlət quruluşunun və dini etiqad azadlığının Konstitusiya ilə təmin edildiyi vurğulanıb. Qeyd olunub ki, ölkənin təhsil siyasəti dünyəvilik, bərabərlik və bütün vətəndaşlar üçün bərabər imkanlar prinsiplərinə əsaslanır.
İşçi qrupun mövqeyinə görə, təhsil müəssisələrində tətbiq edilən qaydalar bütün vətəndaşlara eyni şəkildə şamil olunur və hər hansı dini mənsubiyyətə qarşı yönəlməyib.
“Bu məsələlərin dini və ideoloji müstəvidə siyasiləşdirilməsi, Azərbaycanın konstitusion quruluşuna və təhsil siyasətinə qarşı əsassız ittihamların irəli sürülməsi yolverilməzdir”, – bəyanatda bildirilib.
Prezident İlham Əliyevə qarşı ifadələr tənqid edildi
Bəyanatda Azərbaycan Prezidenti İlham Əliyevə, Azərbaycan xalqına, onun tarixinə və görkəmli şəxsiyyətlərinə qarşı təhqir və böhtan xarakterli ifadələrin işlədilməsi də qəbuledilməz sayılıb.
İşçi qrup Türkiyənin hakim partiyasının bu cür halların qarşısının alınması istiqamətində addım atmamasından təəssüfləndiyini bildirib. Azərbaycanın Türkiyədəki diplomatik nümayəndəlikləri qarşısında keçirilən təxribatçı aksiyalara və bu aksiyalarla bağlı çağırışlara münasibət də bəyanatda suallar doğuran məqam kimi qeyd edilib.
Türkiyənin siyasi dairələrinə çağırış
Azərbaycan–Türkiyə parlamentlərarası əlaqələr üzrə işçi qrupu hesab edir ki, iki ölkə arasındakı münasibətlərin xüsusi xarakteri siyasi məsuliyyət, qarşılıqlı hörmət və bir-birinin daxili işlərinə müdaxilə etməmək prinsiplərinə riayət olunmasını tələb edir.
Bəyanatda vurğulanıb ki, ayrı-ayrı siyasi xadimlərin açıqlamaları Azərbaycan–Türkiyə münasibətlərinə xələl gətirməməlidir.
İşçi qrup Türkiyənin müvafiq siyasi dairələrini, o cümlədən parlamentdə təmsil olunan hakim partiyanın nümayəndələrini həssas məsələlərə məsuliyyətlə yanaşmağa, Azərbaycanın suverenliyinə və konstitusion quruluşuna hörmət göstərməyə, ikitərəfli münasibətlərə mənfi təsir göstərə biləcək açıqlamalardan çəkinməyə çağırıb.
