Elektrik enerjisinin qiyməti artmasa belə, ailələrin aylıq kommunal xərclərinin böyük hissəsini məhz elektrik ödənişləri təşkil edir. Maraqlıdır ki, ən çox enerji sərf edən cihazlar hər zaman göz önündə olmur.
Enerji mütəxəssislərinin sözlərinə görə, elektrik qızdırıcıları və kondisionerlər ümumi istehlakın ən böyük hissəsini təşkil edir. Xüsusilə yay aylarında kondisionerin fasiləsiz işləməsi aylıq ödənişi xeyli artırır.
Elektrik su qızdırıcıları da yüksək enerji sərf edən cihazlar sırasındadır. Lazım olmadıqda onları söndürmək və temperaturu optimal səviyyədə saxlamaq elektrik sərfiyyatını azalda bilər.
Köhnə tip soyuducular yeni enerji səmərəli modellərlə müqayisədə daha çox elektrik istifadə edir. Həmçinin soyuducunun qapısını uzun müddət açıq saxlamaq da əlavə enerji itkisinə səbəb olur.
Bir çox insanın diqqət etmədiyi başqa bir məqam isə televizor, kompüter, modem və digər cihazların “gözləmə rejimi”ndə qalmasıdır. Bu rejimdə belə onlar enerji sərf etməyə davam edir.
Mütəxəssislər LED lampalardan istifadə etməyi, istifadə olunmayan cihazları tam söndürməyi və yüksək enerji sinifinə malik məişət texnikalarına üstünlük verməyi tövsiyə edirlər. Kiçik görünən bu dəyişikliklər il ərzində nəzərəçarpacaq qənaət yarada bilər.
Sunay
