ABŞ-ın Mərkəzi Kəşfiyyat İdarəsinin sabiq proqramçısı Coşua Şulte Nyu-York məhkəməsi tərəfindən məxfi sənədlərin sızdırılması ittihamı ilə 40 il həbs cəzasına məhkum edilib.
Azpost.info bildirir ki, bu barədə Şultenin əməkdaşlıqda ittiham olunduğu WikiLeaks təşkilatı X sosial şəbəkəsində yazıb.
Şulte “Vault 7” adlı tam məxfi materialların ən böyük sızması işi üzrə günahlandırılırdı.
“WikiLeaks “Vault 7″ sənədlərinin yayımçısı olduğu iddia edilən Coşua Şulte bu gün Nyu-York federal məhkəməsində 40 il müddətinə azadlıqdan məhrum edilib”, – WikiLeaks bildirib.
İclasda hakim Cessi Ferman vurğulayıb ki, heç kim heç vaxt Şultenin vurduğu zərərin həcmini bilməyəcək. Eyni zamanda, o, MKİ-nin keçmiş əməkdaşının vurduğu ziyanın böyük olduğuna əminliyini ifadə edib.
Azpost.info
