Bu gün Milli Məclisin İnsan hüquqları komitəsinin iclasında Ombudsman Səbinə Əliyevanın iştirak etməməsi müzakirə mövzusu olub.
Deputat Jalə Əhmədova Ombudsman Səbinə Əliyevanın iclasda iştirakının zəruriliyini vurğulayıb.
Jalə Əhmədova deyib ki, Ombudsmanın deputatlara verəcəyi cavabla Ombudsman Aparatının rəhbəri Aydın Səfixanlının verəcəyi cavablar başqadır: “Deputat olaraq mənə maraqlıdır ki, nə üçün Səbinə xanım bizim iclaslarda iştirak etmir?”.
Fazil Mustafa da qeyd edib ki, Jalə Əhmədovanın fikirləri ilə razıdır: “Ombudsmanın komitə iclasına gəlməsinin heç bir ziyanı yoxdur, bu, kommunikasiya üçün faydalıdır”.
Komitə sədri Zahid Oruc da sözügedən təkliflərlə razı olduğunu qeyd edib: “Qeyd etdiyiniz kimi, Səbinə xanımın bu cür iclaslarda, görüşlərdə iştirakı yalnız fayda verə bilər. Çünki daha sistemli müzakirələr apara bilərik. Əminəm ki, bugünkü çağırışlar eşidildi”.
Aydın Səfixanlı isə qeyd edib ki, Ombudsmanın komitə iclaslarının hamısına gəlməsi kimi bir öhdəlik yoxdur: “Səbinə xanım nadir məmurlardandır ki, hər zaman ictimaiyyətə və əməkdaşlığa açıqdır. O, dəfələrlə Milli Məclisin iclaslarında iştirak edib. Biz bu gün hüquqi dövlətdə yaşayırıq və aydın məsələdir ki, Ombudsmanın fəaliyyəti Konstitusiyaya əsaslanır. Konstitusiya qanunun 14-cü maddəsinin 1-ci hissəsində qeyd olunur ki, Ombudsman öz illik məruzəsini ölkə Prezidenintə təqdim edir və Milli Məclisin qarşısında çıxış edir. Yəni Konstitusiyaya əsasən, Ombudsmanın bütün komitə iclaslarına gəlməsi kimi bir öhdəlik yoxdur. Qeyd edim ki, martın 7-də Səbinə xanım Milli Məclisin Plenar iclasında olacaq və istənilən suallara cavab verəcək”. (APA)
