Gününə bir fincan qəhvə ilə başlayan insanların sayı ildən-ilə artır. Bir çoxları hesab edir ki, acqarına içilən qəhvə həm oyadır, həm də maddələr mübadiləsini sürətləndirir. Lakin dietoloqlar bildirirlər ki, bu vərdiş hər kəs üçün faydalı olmaya bilər.
Azpost.info xəbər verir ki, qidalanma üzrə mütəxəssislər səhər qəhvəsinin orqanizmə təsirinin insanın sağlamlıq vəziyyətindən asılı olduğunu deyirlər.
Qəhvə kofein hesabına mərkəzi sinir sistemini aktivləşdirir və ayıqlığı artırır. Bununla yanaşı, o, mədə turşusunun ifrazını da stimullaşdırır.
Mədə həssaslığı, qastrit və ya reflüks problemi olan insanlarda acqarına qəhvə mədə yanmasını artıra bilər, qarın nahiyəsində narahatlıq yarada bilər, ürəkbulanma hissinə səbəb ola bilər.
Sağlam insanlarda bir fincan şəkərsiz qəhvə adətən ciddi problem yaratmır. Lakin mütəxəssislər qəhvəni yüngül səhər yeməyindən sonra qəbul etməyi daha məqsədəuyğun hesab edirlər.
Dietoloqların tövsiyəsi
Qəhvə ilə birlikdə bir ovuc qoz-fındıq, yulaf sıyığı, qatıq, tam taxıllı çörək və pendir kimi məhsullar qəbul etmək həm enerji verir, həm də mədəni qoruyur. Dietoloqlar bildirirlər ki, gün ərzində 3–4 fincandan artıq qəhvə qəbul etmək yuxu pozğunluğu və narahatlıq riskini artıra bilər.
