Tver vilayətində Rusiya Müdafiə Nazirliyi Baş Raket Artilleriya İdarəsinə məxsus daha bir sursat anbarına zərbə endirilib.
Azpost.info bildirir ki, regionun rəhbəri İqor Rudenya Tver vilayətinin cənub-qərbində Ukrayna Silahlı Qüvvələrinə məxsus bir neçə pilotsuz təyyarənin vurulması barədə məlumat verib.İlkin məlumatlara görə, vurulan PUA-lardan biri vilayətin Toropetsk rayonuna düşüb.
Yerdə fövqəladə hallar xidmətinin mütəxəssisləri işləyir.
Tver vilayətində Staraya Toropa dəmir yolu stansiyası boşaldılıb.
Bölgənin Toropetsk rayonu pilotsuz təyyarələrin hücumuna məruz qaldıqdan sonra stansiyanın təxliyyəsi səhər saat üç radələrində başlayıb. Hazırda bir neçə sərnişin qatarı ləğv edilib. Digərləri, o cümlədən Moskva – Pskov və Sankt-Peterburq – Smolensk, alternativ marşrutla göndərilir və təxminən 2 saat gecikmə ilə səyahət edirlər.
Üç gün əvvəl Toropets şəhərində yerləşən 107 saylı arsenaldan sonra bu gecə ondan 16 km aralıda yerləşən Oktyabrskoye qəsəbəsindəki 23 saylı arsenal da vurulub. Partlayışlar başladıqdan sonra yaxınlıqdakı şose yolunda hərəkət dayandırılıb, dəmir yolu stansiyasından insanlar təxliyyə edilib.
Hər iki arsenalda, eləcə də Krasnodarda partladılmış anbarda yüz minlərlə artilleriya və “Qrad” mərmisi, S-300/400 sistemləri üçün raketlər, Şimali Koreyadan alınmış ballistik raketlər və s. sursat saxlanılırdı.
