Spirtli içkidən 30 gün imtina etmək insanın özünü necə hiss etməsinə, yuxusuna və orqanizmin fəaliyyətinə nəzərəçarpacaq dərəcədə təsir göstərə bilər. Cəmi bir neçə həftə ərzində yuxunun keyfiyyəti, dərinin vəziyyəti və həzm prosesi dəyişə bilər. Alkoqoldan alınan əlavə kalorilərin aradan qalxması isə çəkiyə də təsir edə bilər.
İlk dəyişikliklərdən biri yuxunun yaxşılaşması ola bilər. Spirtli içki həqiqətən yuxuya getməyi sürətləndirə bilər. Lakin alkoqolun orqanizmdə parçalanması zamanı bədən aktiv işləməyə davam edir və bu, yuxunun quruluşunu və keyfiyyətini poza bilər. İçkidən imtina etdikdən sonra gecə istirahəti tədricən daha keyfiyyətli ola bilər.
Qaraciyərin yükü azalır
Alkoqoldan imtina qaraciyərin üzərinə düşən yükü də azaldır. Müntəzəm spirtli içki qəbulu zamanı qaraciyərdə piy yığıla bilər. Ayıq qalmaq isə orqanın bərpasına şərait yaradır.
Bir ay ərzində qaraciyər fermentlərinin bəzi göstəriciləri yaxşılaşa, qaraciyər piylənməsinin əlamətləri azala bilər. Nəticə isə əvvəlki içki vərdişlərindən və qaraciyərin vəziyyətindən asılıdır.
Dərinin görünüşü dəyişə bilər
Alkoqol orqanizmin susuzlaşmasına səbəb ola və qan damarlarına təsir göstərə bilər. Buna görə spirtli içkilərdən imtina üz nahiyəsində şişkinliyin, gözaltı torbaların və dəridə qızartının azalmasına kömək edə bilər.
Zaman keçdikcə dərinin nəmi saxlamaq qabiliyyətində də yaxşılaşma müşahidə oluna bilər.
Çəki azala bilər
Spirtli içkilər əlavə kalori mənbəyidir. Bundan başqa, alkoqol bəzi insanlarda həddindən artıq yemək istəyini gücləndirə bilər.
İçkidən imtina gündəlik qəbul edilən kalorilərin azalmasına səbəb olur. Qidalanma və fiziki aktivlik digər baxımdan dəyişməz qalarsa, çəki tədricən azala bilər. Bununla belə, nəticə insanın əvvəl nə qədər içməsindən və ümumi qidalanmasından asılıdır.
Həzm sistemi rahatlaşa bilər
Spirtli içkilərə fasilə vermək həzm sisteminə də müsbət təsir göstərə bilər. Xüsusilə bəzi insanlarda alkoqol qəbulundan sonra yaranan mədə yanması və turşuluq şikayətləri azala bilər.
Yaddaş və diqqət yaxşılaşa bilər
Alkoqoldan müntəzəm istifadə etməyə öyrəşmiş insan üçün ilk günlər içkisiz yaşamaq qeyri-adi görünə bilər. Lakin bir neçə həftədən sonra vəziyyət sabitləşə, diqqət və yaddaşda yaxşılaşma hiss oluna bilər.
Bəzi insanlarda davamlı narahatlıq və əhval dəyişiklikləri də azala bilər. Bu təsirlər hər kəsdə eyni olmur və yuxu, stress, əvvəlki alkoqol qəbulu kimi amillərdən asılıdır.
Ürək və damarlar üçün faydalı ola bilər
Spirtli içkilərin müntəzəm qəbulu ürək-damar sisteminə əlavə yük yarada və arterial təzyiqin yüksəlməsi ilə əlaqəli ola bilər. Alkoqoldan imtina bəzi insanlarda qan təzyiqinin normallaşmasına kömək edə bilər.
Qan analizlərində də dəyişiklik mümkündür
Bir ay spirtli içki qəbul etməmək bəzi metabolik göstəricilərə də təsir edə bilər. Bunlara hüceyrələrin insulinə həssaslığı, qanda şəkərin səviyyəsi və xolesterin göstəriciləri daxildir. Lakin bu dəyişikliklərin dərəcəsi insanın sağlamlıq vəziyyətindən və əvvəlki içki vərdişlərindən asılıdır.
Vacib xəbərdarlıq
30 gün alkoqoldan imtinanın təsiri əvvəllər nə qədər tez-tez və hansı miqdarda içki qəbul edilməsindən, qidalanmadan, fiziki aktivlikdən və ümumi sağlamlıq vəziyyətindən asılıdır.
Alkoqol asılılığı olan insanlar üçün isə qəfil imtina təhlükəli ola bilər. Abstinensiya sindromu zamanı titrəmə, tərləmə, ürəkdöyünmə, güclü narahatlıq, ağır hallarda isə qıcolma və hallüsinasiyalar yarana bilər. Belə insanlar içkini dayandırmazdan əvvəl tibbi yardım almalıdırlar.
Spirtli içkidən 30 gün uzaq qalmaq sağlamlıq vərdişlərini yenidən qiymətləndirmək üçün faydalı fürsət ola bilər. Ancaq bu müddət bütün xəstəliklərin aradan qalxacağına zəmanət vermir.
N.Talıblı
