3,5-4,5 yaşında televiziyada zorakılıq səhnələrini görən uşaqlar məktəbdə daha pis oxuyur, psixoloji problemlərdən əziyyət çəkirlər.
Azpost.info “EurekAlert” nəşrinə istinadən yazır ki, bu qənaətə Monreal Universitetinin alimləri 978 qız və 998 oğlan, onların valideynləri və müəllimlərinin qatıldığı tədqiqatdan sonra gəliblər.
Əvvəlcə analar və atalar 12 yaşlı uşaqlarının məktəbəqədər yaşda hansı cizgi filmlərinə və televiziya verilişlərinə baxdıqlarını deyiblər. Sonra müəllimlər uşaqların psixoloji durumunu və akademik nailiyyətlərini qiymətləndiriblər.
Məlum olub ki, televiziyada zorakılıq səhnələrinə baxmaq emosional stress və depressiya, dərsə motivasiyanın azalması, ona cəlb olunma və daha pis akademik performansla bağlıdır.
“Məktəbəqədər uşaqlar televiziya personajları ilə eyniləşdirməyə və gördükləri hər şeyi real hesab etməyə meyllidirlər. Problemlərin həlli üçün haqlı bir vasitə kimi zorakılıqdan istifadə edən qəhrəmanların və yaramazların yumoristik təsvirlərinə xüsusilə həssasdırlar. Sürətli templi, adrenalin vuran fəaliyyət səhnələrinə və möhtəşəm xüsusi effektlərə təkrar-təkrar məruz qalmaq, sosial qarşılıqlı münasibətlərdə zorakılığın “normal” olduğuna inamı gücləndirə bilər. Bu, məktəbə uyğunlaşmağı çətinləşdirə bilər,”- tədqiqatın aparıcı müəllifi Linda Paqani deyib.
