Prezident Rəcəb Tayyib Ərdoğanın sədrliyi ilə Beştəpədə keçirilən müdafiə sənayesi sammitində Türkiyəyə havadan gələ biləcək bütün təhlükələrə qarşı “Polad Günbəz” hava hücumundan müdafiə layihəsi ilə bağlı qərar qəbul edilib.
Azpost.info bildirir ki, bu barədə Türkiyənin “Hürriyet” qəzeti yazıb.
Məlumata görə, “Polad günbəz” kompleksində silah sistemləri ilə yanaşı, hədəflərin dəqiq izlənməsi, müəyyən edilməsi və təsnifatını təmin edən radar və elektro-optik sistemlər də fəaliyyət göstərəcək.
Türkiyənin müdafiə və təhlükəsizlik siyasəti üzrə analitiki Turan Oğuzun sözlərinə görə, Rusiyanın S-400 zenit-raket sistemləri də bu müdafiə sisteminə daxil ola bilər: “Mən buna canlı orqanizm deyirəm. Bütün hava hücumundan müdafiə sistemləri, radarlar və rabitə sistemləri bunun altına düşür. Bu, mövcud sistemlərlə məhdudlaşmayacaq, yeni sistemlər də hazırlana bilər. Gələcəkdə kosmosa raketdən müdafiə üçün peyklər çıxaracağıq, ona görə də onlar da bu sistemlə əhatə olunacaq. Həm də bu, hələlik Türkiyə üçündür, lakin gələcəkdə biz onu xaricdəki bazalarımızda quraşdıra biləcəyik. Türkiyə kimi böyük ölkələr bu sistemi geniş miqyasda yaradıblar. S-400-lər də bu sistemə daxil ola bilər. Bizim öz milli sistemimiz olduğundan S-400-ləri də birləşdirə bilərik”, – türkiyəli ekspert qəzetə bildirib.
