İcma rəhbəri:

“Lavrovun “Dağlıq Qarabağ əhalisi” sözləri erməni tərəfinə tutarlı cavabdır”
01 İyul 2020 - 16:12

“Dünən, Azərbaycan və Ermənistan xarici işlər nazirlərinin, ATƏT-in Minsk Qrupunun həmsədrlərinin, eləcə də ATƏT-in fəaliyyətdə olan sədrinin şəxsi nümayəndəsi Anjey Kaspşikin iştirakı ilə onlayn görüş keçirilib. Görüşdə Ermənistan-Azərbaycan münaqişəsinin həlli istiqamətində cari vəziyyət müzakirə edilib. Görüş zamanı Ermənistan Xarici İşlər Naziri Zöhrab Mnatsakanyan münaqişəni təhrif etməyə yönəlik cəhd göstərərək, Azərbaycanın işğal altındakı Dağlıq Qarabağ bölgəsinin erməni icmasını “xalq” kimi qələmə verməyə çalışıb”.

APA-nın məlumatına görə, bunu Azərbaycan Respublikası Dağlıq Qarabağ bölgəsinin azərbaycanlı icmasının rəhbəri Tural Gəncəliyev deyib.

“Azərbaycan Respublikası Dağlıq Qarabağ bölgəsinin azərbaycanlı icmasının rəhbəri olaraq, bəyan edirəm ki, “Dağlıq Qarabağ xalqı” deyə bir anlayış yoxdur, sadəcə Azərbaycanın Dağlıq Qarabağ bölgəsinin əhalisi anlayışı var ki, bu da bölgənin erməni və azərbaycanlı icmalarını əhatə edir. Xatırladım ki, Rusiyanın Xarici İşlər Naziri Serqey Lavrov Bakıya son səfərlərinin birində “Dağlıq Qarabağ əhalisi” sözlərini işlətmişdir ki, bu da erməni tərəfinə tutarlı bir cavabdır”, – deyə icma rəhbəri bildirib.

T.Gəncəliyev qeyd edib ki, 1992-ci ilin mart ayında keçirilmiş ATƏM-in (indiki ATƏT) Helsinki sammitinin yekun sənədində də qeyd edildiyi kimi, Ermənistan və Azərbaycan münaqişə tərəfləri, Azərbaycanın Dağlıq Qarabağ bölgəsinin erməni və azərbaycanlı icmaları isə münaqişənin maraqlı tərəfləridir: “Ermənistan Xarici İşlər Nazirinin münaqişənin formatını təhrif etməyə çalışması Ermənistanın qeyri-konstruktiv mövqeyinin daha bir göstəricisidir və yekun sülhün əldə olunmasını gecikdirməyə hesablanıb.

Bir daha bəyan edirəm ki, Azərbaycan Respublikası Dağlıq Qarabağ bölgəsinin azərbaycanlı və erməni icmaları yalnız Azərbaycan Respublikasının beynəlxalq səviyyədə tanınmış sərhədləri çərçivəsində, birgə sülh şəraitində yaşaya bilərlər”.