Yay aylarında avtomobil sürücülərinin ən çox rastlaşdığı problemlərdən biri kondisioner işə düşən kimi salona yayılan xoşagəlməz qoxudur. Bir çoxları bunu adi hal hesab etsə də, avtomobil ustaları və həkimlər xəbərdarlıq edirlər ki, problem təkcə komfortla bağlı deyil. Kondisioner sistemində yığılan kif, bakteriya və göbələklər sağlamlıq üçün risk yarada bilər.
Azpost.info xəbər verir ki, avtomobil kondisioneri işləyərkən evaporator adlanan hissədə rütubət yaranır. Filtrlər vaxtında dəyişdirilmədikdə və sistem uzun müddət təmizlənmədikdə burada mikroorqanizmlər sürətlə çoxalır.
Avropa Avtomobil Klubları Federasiyası və avtomobil istehsalçıları bildirirlər ki, çirkli salon filtri havadakı toz, polen və bakteriyaları lazımi səviyyədə süzə bilmir. Nəticədə avtomobildə olan şəxslərdə allergiya, göz yaşarması, öskürək və nəfəsalma çətinliyi yarana bilər. Xüsusilə uşaqlar, yaşlılar və astma xəstələri bu risk qrupuna daxildir.
Mütəxəssislər salon filtrinin hər 10–15 min kilometrdən bir və ya ildə ən azı bir dəfə dəyişdirilməsini tövsiyə edirlər. Tozlu yollarda hərəkət edən avtomobillərdə bu müddət daha da qısa ola bilər.
Kondisioneri söndürməzdən əvvəl bunu edin
Avtomobil ustalarının tövsiyəsinə görə, mənzilə çatmazdan təxminən 3-5 dəqiqə əvvəl kondisioneri söndürüb yalnız ventilyatoru işlətmək faydalıdır. Bu üsul evaporatorda qalan rütubətin qurumasına kömək edir və kif əmələ gəlməsi riskini azaldır.
Çirkli filtr hava dövranını zəiflətdiyi üçün kondisioner daha çox işləyir. Bu isə kompressora əlavə yük yaradır və yanacaq sərfiyyatını artırır.
Avtomobil mühəndislərinin fikrincə, kondisioner sisteminin ildə bir dəfə dezinfeksiya olunması həm cihazın ömrünü uzadır, həm də sərnişinlərin sağlamlığını qoruyur. Kiçik bir texniki qulluq sonradan bahalı təmir xərclərinin qarşısını ala bilər.
