Dünyanın ən böyük film festivalları arasında “Youtube”da 10 günlük “We Are One: A Global Film Festival” (Biz birik: qlobal film festivalı) adlı müştərək film festivalı keçirmək barədə razılıq əldə edilib.
“Report” “Deadline”yə istinadən xəbər verir ki, bu layihəyə Kann, Berlin, London (BFİ), Karlovı Varı, Nyu-York, San-Sebastian, Toronto, Venesiya, habelə “Sundance” və “Tribeca” kimi nüfuzlu festivallarla yanaşı, hazırkı koronavirus pandemiyası üzündən fəaliyyətini dayandırmaq məcburiyyətində qalmış başqa festivallar da qoşulub.
Mayın 29-dan iyunun 7-dək davam edəcək onlayn festival çərçivəsində həm yeni, həm də klassik filmlər nümayiş etdiriləcək. Bununla belə 2020-ci il festivalları üçün nəzərdə tutulmuş ekran əsərləri müəllif hüququnun qorunması xatirinə göstərilməyəcək.
Festivalın tamaşaçıları Ümumdünya Səhiyyə Təşkilatının koronavirusla mübarizə fonduna ianələr vermək fürsəti qazanacaqlar.
