ABŞ-ın üç ali təhsil müəssisəsinin ekspertləri smartfon və planşetlərdə gündə təxminən 2 saat videolara baxan üç yaşından kiçik uşaqların söz ehtiyatının əhəmiyyətli dərəcədə pisləşdiyini müəyyən ediblər.
Azpost.info xəbər verir ki, tədqiqat “Acta Paediatrica” jurnalında dərc olunub.
Tədqiqatda 1,5-2,5 yaş arası uşaqları olan 302 valideyn iştirak edib. Onlar övladlarının nə qədər vaxt və hansı məzmuna baxdığını ətraflı təsvir ediblər. Video məzmunun diqqəti yayındırmaq, öyrənmək və ya sakitləşdirmək vasitəsi olması kimi səbəblərə dair məlumatlar da toplanıb. Körpələrin lüğəti və onların tərtib edə bildikləri ən uzun üç cümlə haqqında da məlumat əldə edilib.
Nəticələrin təhlili göstərib ki, uşaqlar videoya nə qədər çox baxsalar, bir o qədər az söz bilirlər və cümlələri bir o qədər qısa olur.
Alimlər onu da müşahidə ediblər ki, valideynlər baxarkən uşağı tək qoymayıb, onunla ünsiyyətdə olub ekranda baş verənləri şərh etsələr, söz ehtiyatına mənfi təsir azalar.
Alimlər valideynlərə uşaqlar üçün ekranda qalma vaxtını azaltmağı tövsiyə ediblər. Əgər bu mümkün deyilsə, o zaman məzmuna baxarkən uşaqla ünsiyyət qurmaq vacibdir, çünki üç yaşına qədər dil mənimsəməsi insanın ümumi inkişafında böyük rol oynayır.
Azpost.info
