Ukrayna Silahlı Qüvvələri (USQ) oktyabrın 9-na keçən gecə Rusiyanın bir sıra regionlarına kütləvi hücumlar həyata keçirib.
Tver vilayətinin Redkino qəsəbəsində pilotsuz uçuş aparatlarının (PUA) hücumu nəticəsində zavod vurulub və yanğın baş verib. Regionun rəhbəri Vitali Korolyov bildirib ki, müəssisənin əməkdaşları xəsarət almayıblar və vaxtında sığınacağa təxliyə olunublar. Yanğın söndürülüb.
Ukraynanın Exilenova+ monitorinq kanalı yazır ki, söhbət Redkino Təcrübə Zavodundan gedir. Bu, regionun ən böyük kimya müəssisəsidir. Zavod X-55 və X-101 qanadlı raketləri üçün yanacaq, həmçinin dizel yanacağı və aviasiya kerosini üçün əlavələr istehsal edir.
Qeyd edək ki, bu ilin fevralında da pilotsuz uçuş aparatları həmin müəssisəyə hücum etmişdi.
Belqorodda ölənlər və yaralananlar var
Belqorod dairəsi də atəşə məruz qalıb. Belqorod vilayətinin operativ qərargahının məlumatına görə, mərmilərin fərdi yaşayış evlərinə düşməsi nəticəsində iki nəfər həlak olub, daha dörd nəfər, o cümlədən bir uşaq yaralanıb.
Hücumdan sonra NASA-nın FIRMS peyk monitorinq sistemi Belqorodun şimalında yerləşən neft bazasında yanğın qeydə alıb.
Bu neft bazası region üçün strateji əhəmiyyət daşıyır. Müəssisə sənaye və kənd təsərrüfatı müəssisələrini, eləcə də yanacaqdoldurma məntəqələrini yanacaqla təmin edir.
Kaluqa vilayətində 9 nəfər yaralanıb
Ukrayna dronları ötən gecə Kaluqa vilayətinə də hücum edib. Vilayətin qubernatoru Vladislav Şapşanın sözlərinə görə, dörd bələdiyyə dairəsi və Kaluqa şəhəri hücuma məruz qalıb.
Qubernator pilotsuz aparatların hədəfinin şəhər infrastrukturu olduğunu bildirib.
“ Təəssüf ki, 9 nəfər yaralanıb, onlardan 5-i xəstəxanaya yerləşdirilib”, – deyə Şapşa Telegram kanalında yazıb.
O əlavə edib ki, iki bələdiyyə dairəsində və Kaluqa şəhərində fərdi yaşayış evlərinə ziyan dəyib. Vilayət üzərində hava hücumundan müdafiə qüvvələri ümumilikdə 26 dronu ələ keçirib.
Rusiya 505 Ukrayna dronunun vurulduğunu açıqlayıb
Rusiya Müdafiə Nazirliyinin məlumatına görə, ötən gecə ölkənin 19 regionu, ilhaq edilmiş Krım, eləcə də Qara və Azov dənizlərinin akvatoriyaları üzərində 505 təyyarə tipli Ukrayna pilotsuz uçuş aparatı “ələ keçirilib və məhv edilib”.
Nazirliyin açıqlamasında dronların Kaluqa, Bryansk, Belqorod, Kursk, Tula, Tver, Smolensk və Moskva vilayətləri, Krasnodar diyarı və Tatarıstan üzərində qeydə alındığı bildirilir.
